Vang-Lom 1-2 (1-1): Øyvind Moe og Reidar Kjæstad.

Lom: Are Kvikstad; Anders Skjelden, Martin Sanden Akslen, Reidar Kjæstad, Trond Brandsar (Alv Holø)(Iver Lund Aakre); Torstein Nordal, Vetle Gjeilo, Frikk Gjeilo, Marvin Flaten, Simen Kvamme Repp (Jo Hesthagen), Øyvind Moe.

Det var duka for lokaloppgjer da nabokommunene Lom og Vang møttest på Ryfoss laurdag. Vi har fått ein god start på sesongen medan Vang stod med to seirar og fire tap før dagens kamp. Og i starten av kampen kunne ein sjå ein skilnad på laga. Vi klarte å spele ballen hurtig frå mann til mann, og kom til fleire store sjanser.

Men vi klarte dessverre ikkje å få ballen i mål. Med det vanlege spissparet Grasdalsmoen/Nyøygard ute med skade og sjukdom var det tidenes toppskårar Øyvind Moe som stilte på topp saman med økonomiprofessor Repp. Og dei to gjorde mykje rett, heilt fram til avslutningane. Begge brente kvar si store sjanse, og også Frikk og Vetle Gjeilo hadde kvar si gode avslutning, og Reidar Kjæstad si heading vart redda på streken. Vang hadde også sine sjanser, og keeper Kvikstad måtte ta fram ei god redning på eit langskot.

Men uttellinga kom altså ikkje, og mot slutten av omgangen vart vi meir og meir utolmodige, og slurva meir og meir med pasningane. Dermed tok Vang over styringa, og fekk også kampens fyrste mål. Dei kom rundt på vår venstre side, la ut 45 grader (etter læreboka...), og sette ballen sikkert i mål. Pent spel, men vi var såpass med folk i feltet at vi burde klart å plukke ut målskåraren. Dette var det fyrste spelemålet vi har slept inn i årets sesong.

Vi fekk vår utlikning like før pause, og endeleg lykkast målkongen Moe. Etter å ha drege 3-4 skotfinter i feltet satte han ballen bak Vang sin høgrøsta keeper. 1-1 ved pause etter at vi kjørte den fyrste halvtimen, medan Vang var best siste kvarteret.

I starten av andre omgang skulle vi på nytt prøve å styre kampen, men det vart berre "sådær". Vi klarte ikkje å jobbe saman som eit lag, og det vart altfor langt mellom lagdelane. Vang slo også mykje langt i medvinden, og hadde eit par store halvsjanser etter at dei slo i bakrom over forsvaret vårt.

Vi skapte fortsatt nokre sjanser, og den største hadde Kjæstad da han skaut rett på keeper på blank goal etter ein corner. Men etter eit frispark klarte ikkje eingong han å bomme. Ballen går i muren, og det er enkelt å putte ballen i mål.

Etter dette legg vi oss litt djupare i bana, og prøver å kontrollere seieren. Vang har ballen mykje, og slår ein del langt, men dei strevar med å kome til dei heilt store sjansene. Vi prøvar likevel å hjelpe dei så best som råd med svært variabelt pasningsspel, og lite bestemt duellspel. Likevel klarar vi å halde tett bakover, og tek med oss ein ny seier, på ein dårleg dag. Det er ingen dårleg eigenskap.

Så nokre ord om motstandar Vang. For sjølv om dei har hatt ei mildt sagt variabel serieopning, viste dei seg som eit godt fjerdedivisjonslag. Dei var sterke fysisk og var gode offensivt, og eg er heilt sikker på at dei kjem til å plukke mykje poeng utover i sesongen. For vår del var dette altså inga stor forestilling, men som det vart sagt i garderoba etter kampen, nå bør plassen i fjerdedivisjon snart vere sikra.